ӨНӨКӨТ БӨЙРӨК ЖЕТИШСИЗДИГИНИН ТЕРМИНАЛДЫК БАСКЫЧЫНДАГЫ БЕЙТАПТАРДА БӨЙРӨК КӨЧҮРҮП ОТУРГУЗУУГА ЧЕЙИН ЖАНА АНДАН КИЙИН ШИЛЕКЕЙ БЕЗДЕРИНИН САПАТТЫК ЖАНА САНДЫК ПАРАМЕТРЛЕРИНИН ӨЗГӨРҮШҮ

Авторлор өнөкөт бөйрөк жетишсиздигинин терминалдык баскычындагы 50 бейтапта шилекей бездеринин абалын изилдешкен. Шилекей бездеринин функциясы ксеростомия тибинде олуттуу бузулганы жана бул аралаш шилекейдин сапаттык жана сандык көрсөткүчтөрүнүн өзгөрүшүнө алып келгени аныкталган. Бөйрөк көчүрүп отургузууга чейин бейтаптардын көпчүлүгүндө ооздун кургашы, шилекей бөлүнүп чыгуу ылдамдыгынын төмөндөшү, шилекейдин илешкектүүлүгүнүн жогорулашы, ооз көңдөйүнүн гигиеналык абалынын начарлашы жана аралаш шилекейдин биохимиялык курамынын өзгөрүшү байкалган. Жалпы белоктун, калийдин, фосфордун, щелочтук фосфатазанын, мочевинанын, креатининдин жана α-амилазанын деңгээли жогорулаганы аныкталган, бул бөйрөк функциясынын олуттуу бузулушун жана шилекей бездеринин компенсациялык реакциясын чагылдырган. Бөйрөк көчүрүп отургузгандан кийин 6 ай өткөн соң бир катар клиникалык жана лабораториялык көрсөткүчтөрдүн ишенимдүү жакшырышы байкалган: ооз менен эриндин кургашы азайган, шилекей бөлүнүп чыгуу калыбына келген, шилекейдин илешкектүүлүгү төмөндөгөн, ооз көңдөйүнүн былжыр челинин абалы жакшырган жана гингивиттин индекси азайган. Ошол эле учурда шилекей бездеринин функциясы толук калыбына келген эмес жана бир катар биохимиялык көрсөткүчтөр нормадан өзгөргөн бойдон калган. Алынган натыйжалар бөйрөк көчүрүп отургузуудан кийин бейтаптарды диспансердик байкоодо кармоо жана шилекей бездеринин функциясын жакшыртуу жана калыбына келтирүү максатында алдын алуучу терапия жүргүзүү зарылдыгын көрсөтөт.